Jaun Elia- Kya Sitam Hai Ke Ab Teri Soorat

 

Ek Hi Muzhdah Subh Laati Hai

Dhoop Aangan Mein Phail Jaati Hai

Rang Mausam Hai Aur Baad-E-Saba

Shahar Koochon Mein Khaak Udaati Hai

Farsh Par Kaaghaz Udte Phirte Hain

Mez Par Gard Jamti Jaati Hai

Kya Sitam Hai Ke Ab Teri Soorat

Ghaur Karne Pe Yaad Aati Hai

Sochta Hoon Ke Us Ki Yaad Aakhir

Ab Kise Raat Bhar Jagaati Hai

So Gaye Ped Jaag Uthi Khushboo

Zindagi Khwab Kyon Dikhati Hai

Us Saraapa Vafaa Ki Furqat Mein

Khwaahish-E-Ghair Kyun Sataati Hai

Kaun Is Ghar Ki Dekh-Bhaal Kare

Roz Ek Cheez Toot Jaati Hai

-------------------------