Majaz - Meri Masti Men Ab Hosh Hi Ka Taur Hai Saaqi

Meri Masti Men Ab Hosh Hi Ka Taur Hai Saaqi
Tere Saaghar Men Ye Sehba Nahin Kuch Aur Hai Saaqi

Bhadakti Jaa Rahi Hai Dam-Ba-Dam Ik Aag Si Dil Men
Ye Kaise Jaam Hain Saaqi Ye Kaisa Daur Hai Saaqi

Vo Shay De Jis Se Neend Aa Jaaye Aql-E-Fitna-Parvar Ko
Ke Dil Aazurdah-E-Tam'iz-E-Lutf-O-Zaur Hai Saaqi

Jawaani Aur Yuun Ghir Jaaye Tuufaan-E-Hawadis Men
Khuda Rakkhe Abhi To Bekhudi Ka Daur Hai Saaqi

Chhalakti Hai Jo Tere Jaam Se Uss Ma'i Ka Kya Kehna
Tere Shaadaab Honthon Ki Magar Kuch Aur Hai Saaqi

Mujhe Peene De, Peene De Ke Tere Jaam-E-La'lee Men
Abhi Kuch Aur Hai , Kuch Aur Hai , Kuch Aur Hai Saaqi

 ----------------------