Shakeel - Teri Mehafil Se Uthkar Ishq Ke Maaron Pe Kya Guzri

 Teri Mehafil Se Uthkar Ishq Ke Maaron Pe Kya Guzri
Mukhalif Ik Jahaan Tha Jaane Bechaaron Pe Kya Guzri

Sahar Ko Rukhsat-E-Bimaar-E-Furqat Dekhne Waalo
Kisi Ne Ye Bhi Dekha Raat Bhar Taaron Pe Kya Guzri

Suna Hai Zindegi Viraaniyon Ne Luut Li Milakar
Na Jaane Zindegi Ke Naaz-Baradaaron Pe Kya Guzri

Hansi Aai To Hai Bekaif Si Lekin Khuda Jaane
Mujhe Masruur Paakar Mere Gamkhvaaron Pe Kya Guzri

Asir-E-Gam To Jaan Dekar Rihaai Paa Gaya Lekin
Kisi Ko Kya Khabar Zindaan Ki Divaaron Pe Kya Guzri

---------------------