Iftikhar Arif
Ye Ab Khula Hai Ke Koi Bhi Manzar Mera Na Tha
Main Jis Mein Rah Raha Tha Wahi Ghar Mera Na Tha
Main Jis Ko Ek Umr Sambhaale Phira Kiya
Mitti Bata Rahi Wo Paikar Mera Na Tha
Mauj-E-Hawa-E-Shahar-E-Muqaddar Jawab De
Dariya Mere Na The Ke Samandar Mera Na Tha
Phir Bhi To Sang-Sar Kiya Ja Raha Hun Main
Kahte Hain Nam Tak Sar-E-Mahzar Mera Na Tha
Sab Log Apne Apne Qabilon Ke Saath The
Ek Main Hi Tha Ke Koi Bhi Lashkar Mera Na Tha
---------------------------
