Ghalib - Ghair Lein Mehfil Mein Bose Jaam Ke

Ghair Lein Mehfil Mein Bose Jaam Ke
Ham Rahein Yoon Tishna-Lab Paighaam Ke

Khastagi Ka Tum Se Kya Shikwa Ki Ye
Hathkande Hain Charkh-E-Neeli-Faam Ke

Khat Likhenge Garche Matlab Kuchch Na Ho
Ham To Aashiq Hain Tumhaare Naam Ke

Raat Pee Zamzam Pe Mai Aur Subh-Dam
Dhoye Dhabbe Jaama-E-Eharaam Ke

Dil Ko Aankhon Ne Fasaaya Kya Magar
Ye Bhi Halqe Hain Tumhaare Daam Ke

Shaah Ke Hai Ghusl-E-Sehat Ki Khabar
Dekhiye Kab Din Phirein Hammaam Ke

Ishq Ne 'Ghalib' Nikamma Kar Diya
Warna Ham Bhi Aadmi They Kaam Ke


-----------------------