Alam-e-Abbas Ki Aamad
Jab Ran Mein Sar Buland Ali Ka Alam Hua
Fauj-e-Khuda Pe Saya-e-Abr-e-Karam Hua
Charkh-e-Zabar Jadee Pe Tasleem Kham Hua
Panje Pe Saat Baar Tasadduq Hasham Hua
Dekha Na Tha Kabhi Jo Alam Is Namood Ka
Dono Taraf Ki Fauj Mein Ghul Tha Durood Ka
Wo Shaan Us Alam Ki Wo Abbas Ka Jalal
Nakhl-e-Zamurradi Ke Tale Tha Ali Ka Laal
Parcham Pe Jaan Deti Thin Pariyon Ka Tha Ye Haal
Ghul Tha Ke Dosh-e-Hoor Pe Bikhre Hue Hain Baal
Har Lehar Aabdar Thi Kausar Ki Mauj Se
Tooba Bhi Dab Gaya Tha Phirere Ki Oaj Se
Tha Panjtan Ka Noor Jo Panje Mein Jalwa Gar
Aama Ki Putliyon Mein Bhi Tha Roshni Ka Ghar
Zarre Nisar Karte The Uth Uth Ke Apna Zar
Takte The Fauq Se To Malak Takht Se Bashar
Allah Re Chamak Alam-e-Bu Turab Ki
Taar-e-Nazar Bani Thi Kiran Aaftab Ki
Qurban Ehtisham Alamdar Naamwar
Rukh Par Jalalat-e-Sher-e-Mardan Thi Sar Basar
Chehra To Aaftab Sa Aur Sher Ki Nazar
Qabze Mein Tegh, Bar Mein Zirah, Dosh Par Sipar
Chhaya Tha Raub Lashkar-e-Ibn-e-Ziyad Par
Ghul Tha Chadhe Hain Sher-e-Ilahi Jehad Par
Wo Oaj Wo Jalal Wo Iqbal Wo Hasham
Wo Noor Wo Shaukat Wo Tauqeer Wo Karam
Panje Ki Wo Chamak Wo Sar Afrazi-e-Alam
Girti Thi Barq Fauj-e-Mukhalif Pe Dam Ba Dam
Kya Rifaat-e-Nishan-e-Saadat Nishan Thi
Saye Mein Jis Nishan Ke Tooba Ki Shaan Thi
Panja Utha Ke Haath Ye Kehta Tha Baar Baar
Aalam Mein Panjtan Ki Buzurgi Hai Aashkar
Ye Shash Jihat Unhi Ke Qadam Se Hai Barqarar
Kyun Haft Dosto Hote Ho Ae Qaum-e-Nabakar
Aathon Bahisht Milte Hain Maula Ke Naam Se
Baiyat Karo Husain Alaihissalam Se
Ghurfon Se Jhank Jhank Ke Boli Har Ek Hoor
Sall-e-Ala Alam Ki Chamak Hai Ke Barq-e-Toor
Ya Rab Rahe Nigah-e-Bad Is Ki Ziya Se Door
Panja Hai Ye Ke Ek Jagah Panjtan Ka Noor
Jalwe Hain Sab Muhammad-o-Haider Ki Shaan Ke
Qurban Us Jawan Ke Nisar Us Nishan Ke
Aage Kabhi Na Dekhi Thi Is Husn Ki Sipah
Duniya Bhi Khoobiyon Ka Muraqqa Hai Wah Wah
Dekhen Kise Kise Ke Hai Ek Ek Rashk-e-Mah
Jaati Hai Jis Ke Rukh Pe To Phirti Nahin Nigah
Dekho Inhi Damo Se Hai Raunaq Zameen Ko
Chun Kar Husain Laye Hain Kis Kis Haseen Ko
Shohra Bahut Tha Husn Mein Kanaan Ke Mah Ka
Qissa Suna Hua Hai Zulaikha Ki Chah Ka
Yaan Aaftab Ko Nahin Yara Nigah Ka
Yusuf Hai Ek Ek Jawan Is Sipah Ka
Sunte The Hum Ke Aalam-e-Ijaad Zisht Hai
Aise Chaman Khile Hain Ke Duniya Bahisht Hai
Hum Shakl-e-Mustafa Ka Hai Kya Husn Kya Jamal
Subh-e-Jabeen Bhi Aur Shab-e-Gesu Bhi Be-Misal
Ye Lab Ye Khat Ye Chashm Ye Abroo Ye Rukh Ye Khaal
Yaqoot-o-Mushk-o-Nargis-o-Najm-o-Mah-o-Hilal
Ek Gul Pe Yaan Hazaar Tarah Ki Bahar Hai
Chehra Na Kahiye Qudrat-e-Parwardigar Hai
Lakht-e-Dil-e-Hasan Bhi Hai Kis Martaba Haseen
Jis Ke Chiragh-e-Husn Se Roshan Hai Sab Zameen
Ye Zulf-e-Mushk Beez Ye Aaina Jabeen
Sarmaya-e-Khata-o-Khatan Kainat-e-Cheen
Rukh Ki Balayein Leti Hain Pariyan Khadi Hui
Sehre Ki Har Ladi Se Hain Aankhen Ladi Hui
Naam-e-Khuda Hain Aun-o-Muhammad Bhi Kya Shakeel
Ek Mehr-e-Be-Nazeer Hai Ek Badr-e-Be-Adeel
Afrokhta Hain Rukh Ye Shujaat Ki Hai Daleel
Himmat Badi Hai Go Ke Hain Umrein Abhi Qaleel
Misl-e-Ali Hain Jang-o-Jadal Par Tale Hue
Dono Ke Neemchon Ke Hain Dore Khule Hue
Abbas Naamwar Bhi Ajab Saj Ka Hai Jawan
Nazan Hai Jis Ke Dosh-e-Munawwar Pe Khud Nishan
Hamza Ka Raub, Saulat-e-Jafar, Ali Ki Shaan
Hashim Ka Dil, Husain Ka Bazu, Hasan Ki Jaan
Kyun Kar Na Ishq Ho Shah-e-Gardoon Janab Ko
Haasil Hain Sekron Sharaf Is Aaftab Ko
Is Mehr Ko To Dekho Ye Zarre Hain Jis Ke Sab
Sartaj Aasman-o-Zameen Noor-e-Arsh-e-Rab
Abr-e-Karam, Khadiw-e-Ajam, Khusrau-e-Arab
Aali Himam, Imam-e-Umam, Shah-e-Tishna Lab
Junban Zaban-e-Khushk Hai Zikr-e-Ilah Mein
Goya Khade Hain Khatm-e-Rusul Razmgaah Mein
Kya Fauj Thi Husain Ki Is Fauj Ke Nisar
Ek Ek Aabroo-e-Arab Fakhr-e-Rozgar
Jarrar-o-Deen Panah Numoodar Naamdar
Larkon Mein Sabza Rang Koi Koi Gul Izar
Faujen Koi Samati Thin Un Ki Nigah Mein
Wo Sab Pale The Beshah-e-Sher-e-Ilah Me
Ek Ek Malik-e-Jurrat-o-Himmat Ka Badshah
Kaivan Khadam, Sipahr Hasham, Arsh Bargah
Aankhen Ghazal-e-Rashk Magar Sher Ki Nigah
Wo Raub Chehron Mein Ke Allah Ki Panah
Dekha To Dil Ko Tod Ke Barchhi Nikal Gayi
Abroo Zara Jo Hil Gaye Talwar Chal Gayi
Wo Ishtiyaq-e-Jang Mein Larkon Ke Walwale
Be-Taab The Ke Dekhiye Talwar Kab Chale
Chehre Wo Aaftab Se Wo Chand Se Gale
Sab Fatima Ki Betiyon Ki God Ke Pale
Ek Ek Rasool-e-Haq Ki Lahad Ka Chiragh Tha
Jis Par Ali Ne Ki Thi Riyazat Wo Bagh Tha
Akbar Se Arz Karte The Seena Sipar Kiye
Ye Neemche Na Lenge Dam Be-Lahoo Piye
Gar Aaj Mar Gaye To Qayamat Talak Jiye
Sadqe Hon Us Qadam Pe Ye Sar Hain Isi Liye
Aaqa Ke Aage Lutf Hai Tegh Aazmai Ka
Aaj Aap Dekhiye Ga Tamasha Larai Ka
Bachpan Pe Khadiman-e-Ulul Azm Ke Na Jayen
Jab Chahen Maarke Mein Hamein Aap Aazmayen
Tan Tan Ke Roken Barchhiyan Hans Hans Ke Zakhm Khayen
Bijli Gire To Munh Pe Jhijhak Kar Sipar Na Layen
Jhapke Palak Kisi Se To Aankhen Nikaliye
Barh Kar Haten Jo Paon To Sar Kaat Daliye
Kehte The Muskura Ke Ye Zainab Ke Dono Laal
Khilte Hain Khud Dileron Ke Johar Dam-e-Jadal
Har Waqt Chahiye Madad-e-Sher-e-Zuljalal
Nare Abhi Karen To Hile Arsa-e-Qital
Utri Hai Tegh Jin Ke Liye Wo Diler Hain
Hum Sab Ko Jante Hain Ke Sheron Ke Sher Hain
Ye Chehchahe Jo Karte The Baham Wo Gul Izar
Shabbir Dekhte The Kanakhiyon Se Baar Baar
Paas Aa Ke Arz Karte The Abbas-e-Naamdar
Sunte Hain Aap Kehte Hain Jo Kuch Ye Jaan Nisar
Jurrat Tapak Rahi Hai Har Ek Ke Kalam Se
Ye Neemche Rukenge Bhala Fauj-e-Shaam Se
Ye Sun Ye Zor-o-Shor Ye Umrein Ye Aan Baan
Ye Bhole Bhole Munh Pe Jawan Mardiyan Ye Shaan
Baatein Rajaz Se Kam Nahin Allah Re Khush Bayan
Chalti Hai Zulfiqar-e-Ali Ki Tarah Zaban
Kis Dabdabe Se Kandhon Pe Neze Sambhale Hain
Goya Chalan Larai Ka Sab Dekhe Bhaale Hain
Zainab Ke Laadlon Ki Taraf Dekhiye Huzoor
Misl-e-Araq Tapakta Hai Peshaniyon Se Noor
Rukh Par Jalal-e-Sher-e-Khuda Ka Hai Sab Zuhur
Parto Gulon Ka Hai Ke Chamakti Hai Barq-e-Toor
Dono Mein Saaf Haider-o-Jafar Ke Toor Hain
Allah Ki Panah Ye Teori Hi Aur Hain
Ye Zikr Tha Ke Bajne Laga Tabl Us Taraf
Mushkil Kushai Ki Fauj Ne Bandhi Idhar Bhi Saf
Teeron Ne Rukh Kiya Su-e-Ibn-e-Shah-e-Najaf
Seenon Ko Ghaziyon Ne Idhar Kar Diya Hadaf
Tha Bas Ke Shauq-e-Jang Har Ek Rashk-e-Mah Ko
Josh Aa Gaya Wigha Ka Husaini Sipah Ko
Ghusse Se Aaftab Hue Mah-Vashon Ke Rang
Faujon Pe Ja Parin Ye Dilon Ki Hui Umang
Tan Tan Ke Barchhiyan Jo Sambhalin Baraye Jang
Bechain Ho Gaye Faras-e-Ablaq-o-Sarang
------------------
No comments:
Post a Comment