Jab Ran Mein Sar Buland Ali Ka Alam Hua
Tanta Hua Barha Koi Qabze Ko Choom Ke
Bhala Kisi Ne Rakh Liya Kandhe Pe Jhoom Ke
Bola Koi Ye Ghoul Hain Kya Shaam-o-Room Ke
Tukde Udayenge Umar-o-Shimr-e-Shoom Ke
Namard Hain Jo Aankh Churate Hain Mard Se
Dono Ko Chaar Kar Ke Phiren Ge Nabard Se
Do Lakh Se Nazar Kisi Ghazi Ki Lar Gayi
Bal Kha Ke Rukh Pe Zulf Kisi Ki Akad Gayi
Chitwan Kisi Ki Shor-e-Dahal Se Bigad Gayi
Munh Surkh Ho Gaya Shikan-e-Abroo Par Gayi
Nikla Koi Samand Ko Ranon Mein Daab Ke
Ghusse Se Reh Gaya Koi Honton Ko Chaab Ke
Barh Kar Kisi Ne Teer Milaya Kaman Se
Neza Koi Hilane Laga Aan Baan Se
Nara Kisi Ka Paar Hua Aasman Se
Talwar Kheench Li Kisi Safdar Ne Miyan Se
Ek Shor Tha Ke Talkh Kiya Hai Hayat Ko
Lashon Se Chal Ke Paat Do Nahr-e-Furaat Ko
Sunte Hi Ye Kalam Jo Aanan-e-Naamwar
Larke Alag Khade Hue Ghoul Apna Bandh Kar
Kehte The Neemche Liye Wo Ghairat-e-Qamar
Ya Rab Shikast Kufiyon Ko De Hamein Zafar
Sar Ke Na Phir Wigha Mein Jo Barh Ke Qadam Garhe
Ja Kar Dar-e-Yazid Pe Apna Alam Garhe
Abbas Shah Se Kehte The Biphre Hue Hain Sher
Teer Is Taraf Se Aa Chuke Ab Kis Liye Hai Der
Do Din Ki Bhook Pyas Mein Hain Zindagi Se Sair
Maula Ghulam Se Nahin Rukne Ke Ye Diler
Paas-e-Adab Se Ghaiz Ko Tale Hue Hain Ye
Sher-e-Khuda Ki God Ke Pale Hue Hain Ye
Kis Ko Hataye Kis Ko Sambhale Ye Jaan Nisar
Marne Pe Ek Dil Hain Behtar Wafa Shiar
Hai Maslihat Ko Dijiye Ab Izn-e-Karzar
Aisa Na Ho Ke Ja Paren Lashkar Pe Ek Baar
Barham Hain Sarkashi Pe Sawaran-e-Shaam Ki
Akbar Ki Baat Mante Hain Na Ghulam Ki
Jab Rokta Hoon Main Inhen Ae Aasman Sarir
Kehte Hain Kyun Imam Ki Janib Lagaye Teer
Bandhe Hai Sarkashi Pe Kamar Lashkar-e-Sharir
Hangam-e-Jang Sher Ke Bachche Hon Gosha Gir
Kis Qahr Ki Nazar Se Laeenon Ko Takte Hain
Bachchon Ko Hai Ye Ghaiz Ke Aansu Tapakte Hain
Ek Ek Jari Ko Tishna-e-Jurrat Ka Josh Hai
Aalam Hai Bekhudi Ka Pe Marne Ka Hosh Hai
Har Saf Mein Ya Ali Wali Ka Kharosh Hai
Kehte Hain Baar Baar Ke Sar Baar-e-Dosh Hai
Mushtaq Hain Wo Pyas Mein Teghon Ke Ghaat Ke
Dar Hai Ke Mar Na Jayen Gale Kaat Kaat Ke
Hasrat Se Ki Su-e-Rufaqa Shah Ne Nazar
Bole Habib Nazar Ko Hazir Hain Sab Ke Sar
Farmaya Shah Ne Hum Bhi Hain Aamada-e-Safar
Achha Barhe Jehad Ko Ek Ek Naamwar
Ye Rah-e-Haq Hai Jo Qadam Aage Barhaye Ga
Darbar-e-Mustafa Mein Wohi Pehle Jaye Ga
Muzda Ye Sun Ke Shad Hue Ghaziyan-e-Deen
Ek Ek Diler Jane Laga Su-e-Fauj-e-Keen
Jab Nara Zan Hue Sifat-e-Sher-e-Khashmgeen
Tharraye Aasman Ke Tabaq Hil Gayi Zameen
Barpa Tha Shor-e-Hashr Dileron Ki Harb Se
Faujen To Kya Jahan Teh-o-Bala Tha Zarb Se
Allah Re Jehad Habib Aur Zuhair Ka
Goya Bapa Tha Maarka-e-Khandaq-o-Hunain Ka
Jab Mar Gaye Wo Aashiq-e-Sultan-e-Mashriqain Ka
Maqtal Mein Peette Hue Daure Gaye Husain
Yun Ja Ke Roye Un Ke Tan-e-Paash Paash Par
Jis Tarah Bhai Rota Hai Bhai Ki Laash Par
Khali Hua Qadeem Rafiqon Ka Jab Pura
Kanpa Sipahr Shah Ne Dam-e-Sardiyan Bhara
Katne Laga Azeezon Ka Bhi Jab Chaman Hara
Gah Roye Aap Haath Jigar Par Kabhi Dhara
Larke Jo Yak Ba Yak Kai Haathon Se Kho Gaye
Tukde Hasan Ki Tarah Kaleje Ke Ho Gaye
Thi Qahr-e-Haq Aqeel Ke Poton Ki Karzar
Shamsheer-e-Haidari Ka Namoona The Jin Ke Waar
Izzat-e-Arab Ki Rakh Gaye Jafar Ke Yaadgar
The Teen Chaar Sher Ke Jhapte Su-e-Shikaar
Fatah-o-Zafar Thi Misl-e-Ali Ikhtiyar Mein
Panje Mein Tha Wohi Jise Taka Hazaar Mein
Nikle Baradaran-e-Alamdar-e-Saf Shikan
Dikhla Diye Ali Ki Larai Ke Sab Chalan
Be Sar The Morchon Mein Jawanan-e-Peel Tan
Laashon Pe Laashen Girti Thin Parta Tha Rann Pe Rann
Aankhon Mein Phir Rahi Thi Chamak Zulfiqar Ki
Abbas Daad Dete The Ek Ek Waar Ki
Tha Chhote Bhaiyon Ke Liye Muztarib Jo Dil
Gah Shah Ke Paas The Kabhi Lashkar Ke Muttasil
Nara Ye Tha Ke Sher Hai Maa Ka Tumhein Bihal
Sheron Ke Rukte Nahin Haath Badan Go Muzmahil
Ye Waqt-e-Aabroo Hai Bari Jadd-o-Jehd Karo
Haan Bhaiyo Imam Ki Apne Madad Karo
Ulto Paron Ko Barh Ke Safon Ko Bicha Ke Aao
Sahil Ke Paas Khoon Ka Dariya Baha Ke Aao
Jab Baag Uthao Fauj Ke Us Paar Ja Ke Aao
Ya Mar Ke Aao Ya Unhein Rann Se Bhaga Ke Aao
Haan Safdar-o-Nishan Na Rahe Fauj-e-Shaam Ka
Beton Ko Paas Chahiye Baba Ke Naam Ka
Reh Kar Husain Kehte The Bhai Se Dam Ba Dam
Daulat-e-Pidar Ki Lut'ti Hai Aur Dekhte Hain Hum
Jeene Na Dega Aah Hamein Bhaiyon Ka Gham
Abbas Arz Karte The Ae Qibla-e-Umam
Ab Baap Ki Jagah Shah-e-Aali Maqam Hain
Sadqe Na Kis Tarah Hon Ke Hum Sab Ghulam Hain
Be Jaan Hue Jo Rah-e-Khuda Mein Do Sher-e-Nar
Hazrat Zaeef Ho Gaye Kham Ho Gayi Kamar
Matam Mein The Ke Maut Ne Loota Hasan Ka Ghar
Ek Dam Mein Qatl Ho Gaye Dono Jawan Pisar
Sab Chal Base Nabi-o-Ali Paas Reh Gaye
Bahattar Mein Akbar-o-Abbas Reh Gaye
Aaya Nazar Jo Laasha-e-Naushah-e-Nek Khu
Akbar Ki Chashm-e-Tar Se Tapakne Laga Lahoo
Ki Ghaiz Ki Nazar Tarab-e-Lashkar-e-Adu
Pehle Se Aaye Rote Hue Shah Ke Rubaru
Nikli Ye Baat Josh-e-Buka Mein Zaban Se
Qasim Ke Saath Jayenge Hum Bhi Jahan Se
Bachpan Se Hum Se Ye Na Hue The Kabhi Juda
Soye To Ek Farsh Yeh Khele To Ek Ja
Tifli Ka Saath Chhoot Gaya Wa Musibata
Mar Jaye Aisa Bhai To Jeene Ka Lutf Kya
Hasrat Ye Hai Ke Teghon Se Tan Paash Paash Ho
Pehlu Mein Ibn-e-Am Ke Hamari Bhi Laash Ho
------------
No comments:
Post a Comment