Jab Ran Mein Sar Buland Ali Ka Alam Hua
Shah Ne Kaha Ke Sach Hai Ye Aisa Hi Hai Alam
Khaliq Jahan Mein Bhai Ka Bhai Ko De Na Gham
Bazu Ka Tootna Ajal Aane Se Kya Hai Kam
Mar Mar Ke Gham Mein Bhai Hasan Ke Jiye Hain Hum
Taza Tha Gham-e-Pidar Ka Khushi Dil Se Faut Thi
Abbas-e-Naamdar Na Hote To Maut Thi
Bhai Ke Baad Un Se Mili Lazzat-e-Hayat
Be Kas Ke Gham Gusaar The Ye Ya Khuda Ki Zaat
Khali Na Payi Mehr-o-Murawwat Se Koi Baat
Soya Jo Main To Un Ko Kati Jaagne Mein Raat
Sadme Bhulaye Dil Se Hasan Ki Judai Ke
Rone Nahin Diya Mujhe Matam Mein Bhai Ke
Hai Un Ke Ittihad Ka Sab Se Juda Maza
Bete Ka Lutf, Bhai Ka Haz, Baap Ka Maza
Milta Hai Baat Baat Mein Har Dam Naya Maza
Ojhal Ye Aankh Se Hon To Jeene Ka Kya Maza
Qaim Rakhe Khuda Ke Ali Ke Nishan Hain
Malik Yahi Hain Ghar Ke Yahi Tan Ki Jaan Hain
Quwwat Jigar Ki Tum Ho To Ye Bazuon Ka Zor
Bichhra Jo Do Mein Ek To Phir Main Kinare Gor
Hota Hai Zakhm-e-Dil Pe Namak Aansuon Ka Shor
Jab Putliyan Juda Hon To Chashm-e-Bashar Hai Kor
Tum Pehluon Mein The Jo Ye Be Kas Sambhal Gaya
Phir Khatma Hai Jism Se Jab Dam Nikal Gaya
In Se Nishan-e-Ali Ka Hai Tum Se Hamara Naam
Ghar Hat Gaya Nabi Ka Jo Dono Hue Tamam
Mayyat Ke Dafn Ka Bhi Muqaddam Hai Intizam
Marne Ke Baad Koi To Aaye Hamare Kaam
Turbat Pe Tum Se Gul Hon To Dil Bagh Bagh Ho
Andher Hai Jo Qabr-e-Pidar Be Chiragh Ho
Kijo Na Zikr-e-Hijr Pe Sadma Hai Dil Kharash
Bahr-e-Pidar Karo Kafan-o-Gor Ki Talash
Hoga Ye Jism Zulm Ki Teghon Se Paash Paash
Do Shakhs Chahiye Ke Uthayen Hamari Laash
Rone Ko Koi Dost Na Yaro Sarhane Ho
Farzand Painti Ho Baradar Sarhane Ho
Akbar Ne Sun Ke Baap Se Ye Ashk-e-Khoon Bahaye
Abbas Bol Uthe Na Khuda Wo Ghadi Dikhaye
Hai Zindagi Yahi Ke Hamein Pehle Maut Aaye
Khak Us Ghulam Par Jo Aaqa Ki Laash Uthaye
Dast-e-Qawi Hain Neza-o-Samsaam Ke Liye
Paye Hain Kya Ye Haath Isi Kaam Ke Liye
Bas Gir Pada Ye Keh Ke Qadam Par Wo Bawafa
Jhuk Kar Kaha Husain Ne Bhai Ye Kya Kiya
Qasim Ka Zikr Karte The Hum Shakl-e-Mustafa
Baatein To Un Se Thin Tumhein Kyun Ghaiz Aa Gaya
Hum Tum To Saath Gulshan-e-Hasti Se Jayenge
Achha Hamari Laash Ko Akbar Uthayenge
Uthe Qadam Se Aap Ki Ulfat Ke Main Nisar
Ghusse Mein Bhool Jate Ho Bhai Hamara Pyar
Aankhen Qadam Par Mal Ke Ye Bola Wo Naamdar
Be Izn-e-Jang Sar Na Uthayega Khaksar
Aisa Na Hon Khajil Hon Risalat Maab Se
Pehle Marunga Akbar-e-Aali Janab Se
Sadqa Ali Ki Rooh Ka Akbar Ko Rokiye
De Kar Qasam Shabeeh-e-Payambar Ko Rokiye
Noor-e-Nigah-e-Bano-e-Be-Par Ko Rokiye
Ae Aaftab-e-Deen Mah-e-Anwar Ko Rokiye
Pehle Raza Mile To Bahut Nek Naam Hon
Aaqa Ye Shahzada Hai Aur Main Ghulam Hon
Shah Ne Kaha Ke Sar To Qadam Se Uthaiye
Lijiye Raza-e-Jang Na Aansu Bahaiye
Furqat Mein Hum Maren Ke Jiyen Khair Jaiye
Apni Sakina-e-Jaan Se Ja Kar Mil Aaiye
Zauja Ko Peette Hue Sar Dekh Lijiye
Bachchon Ko Aur Ek Nazar Dekh Lijiye
Abbas Shah Ke Gird Phire Aath Ke Saat Baar
Bhai Ko Ghar Mein Le Ke Chale Shah-e-Zi Waqar
Bola Ye Paik-e-Shatir Fauj-e-Sitam Shiar
Lo Izn-e-Jang Pa Chuke Abbas-e-Naamdar
Khud Dekh Kar Ye Haal Phira Hoon Main Raah Se
Milne Gaye Hain Khaime Mein Namoos-e-Shah Se
The Aage Aage Haathon Se Thame Kamar Imam
Nara Ye Dam Ba Dam Tha Ke Ab Hum Hue Tamam
Teghon Se Ghaat Rok Lo Aaya Wo Nek Naam
Ab Maarka Hai Qabr Ka Ae Sakinan-e-Shaam
Dekho Bache Raho Ke Larai Hai Sher Se
Chhootegi Mushkilon Mein Tarai Diler Se
Dil Mil Gaye Sipah Ke Sunte Hi Ye Khabar
Kanpe Misaal-e-Baid Jo Aanan-e-Pur Jigar
Halchal Mein Is Taraf Ke Pare Ho Gaye Udhar
Sahil Se Hat Ke Nahr Pukari Ke Al-Hazar
Peechhe Haten Safen Ye Talatum Ayan Hua
Dariya Jo Baadh Par Tha Wo Ulta Rawan Hua
Toote Wo Morche Jo Bandhe The Paye Jadal
Barchhi Giri Zameen Pe Kisi Ki Kisi Ki Dhaal
Allah Ri Haibat-e-Khalaf-e-Sher-e-Zuljalal
Kanpi Zameen Khade Hue Roen Tanon Ke Baal
Munh Zard Ho Ke Reh Gaya Har Naujawan Ka
Dasht-e-Nabard Khet Bana Zafran Ka
Tha Shash Jihat Mein Ghul Ke Ye Hai Roz-e-Inqilab
Ultega Is Zameen Ka Waraq Ibn-e-Bu Turab
Is Sher Par Na Hogi Koi Fauj Fatah Yaab
Bas Ab Bina-e-Aalam-e-Imkan Hui Kharab
Hamla Ghazab Hai Bazu-e-Shah-e-Hijaz Ka
Langar Na Toot Jaye Zameen Ke Jahaz Ka
Dar Hai Hawa Thi Ek Taraf Gard Ek Taraf
Bharte The Khaibari Bhi Dam-e-Sard Ek Taraf
Simte Hue The Kufe Ke Namard Ek Taraf
The Ro Siyah Shaam Ke Sab Zard Ek Taraf
Bhage The Neza Baaz Larai Ko Chhod Ke
Zaigham Nikal Gaye The Tarai Ko Chhod Ke
Thi Ibtari Sipah-e-Zalalat Shiar Mein
Us Saf Mein Thi Wo Saf Ye Qataar Us Qataar Mein
Sau Baar Jo Lade The Akele Hazaar Mein
Wo Jaye Aman Dhoondhte The Karzar Mein
Chehre The Zard Khauf Se Haider Ke Laal Ke
Namard Munh Chhupaye The Ghunghat Mein Dhaal Ke
Sar Ko Dahaye Fauj-e-Mukhalif The Be Hawaas
Kuch Shimr Ke Qareeb The Kuch The Umar Ke Paas
Sab Ka Ye Qaul Tha Ke Hui Zindagi Se Yaas
Zarb-e-Ali Hai Zarb-e-Alamdar-e-Haq Shanas
Taqat Se Hain Bhare Hue Bazu Diler Ke
Khaibar Kusha Ka Zor Hai Panje Mein Sher Ke
Is Fauj Mein Hai Go Ye Tazalzul Ye Intishar
Hathiyar Idhar Lagate Hain Abbas-e-Naamdar
Muztar Hain Bibiyan Shah-e-Wala Hain Be Qarar
Bhai Ke Munh Ko Dekh Ke Rote Hain Zaar Zaar
Beta Khada Hai Chaak Gareban Kiye Hue
Roti Hai Sukhi Mashk Sakina Liye Hue
------------
No comments:
Post a Comment