Jab Ran Mein Sar Buland Ali Ka Alam Hua
Munh Dekhti Hai Baap Ka Jab Wo Ba Chashm-e-Tar
Kehte Hain Ye Ishare Se Sultan-e-Bahr-o-Bar
Lutta Hai Baap Tum Ko Sakina Nahin Khabar
Jaane Na Do Chacha Ko Hamein Chahti Ho Gar
Aansu Baha Baha Ke Na Pani Ka Naam Lo
Daman Qaba Ka Nanhe Se Haathon Se Thaam Lo
Bhai Ke Iztirab Se Zainab Ka Hai Ye Haal
Dhalki Hui Hai Sar Se Rida Aur Khule Hain Baal
Abbas Se Ye Kehti Hai Ro Kar Ba Sad Malal
Chhodo Na Shah Ko Ae Asad-e-Karbala Ke Laal
Kya Kehte Ho Sakina Se Munh Mor Mor Ke
Bhaiya Kidhar Chale Mere Bhai Ko Chhod Ke
Dekho To Haal Sibt-e-Rasool-e-Falak Asas
Bete Ka Gham, Bhatije Ka Matam, Hujoom-e-Yaas
Hai Kasrat-e-Sipah Mein Tanha Wo Haq Shanas
Qurban Jaun Tum To Raho Be-Watan Ke Paas
Aashiq Ho Dilbar-e-Asad-e-Zuljalal Ke
Bazu Qawi Tumhi Se Hain Zahra Ke Laal Ke
Abbas Kehte Hain Ke Na Jaun To Kya Karun
Kyun Kar Na Haq Imam-e-Zaman Ka Ada Karun
Ultoon Safen Hazaron Se Tanha Wigha Karun
Ye Sar Hai Liye Ke Qadam Par Fida Karun
Pahucha Hai Faiz Syed-e-Khushkhu Ke Haath Se
Duniya Mein Kuch To Kaam Ho Bazu Ke Haath Se
Rukhsat Talab Hai Shah Se Ek Sarwala Faram
Shahzada Mere Jaye Salamat Rahe Ghulam
Lillah Rokiye Na Ab Ae Khwahar-e-Imam
Wo Amr Kijiye Ke Barhe Jis Se Mera Naam
Be Kas Hoon Saath Maa Nahin Sar Par Pidar Nahin
Main Aap Ka Ghulam To Hoon Go Pisar Nahin
Baatein Ye Sun Ke Roti Hain Zainab Jhuka Ke Sar
Tharra Rahi Hai Zauja-e-Abbas-e-Naamwar
Chehra To Faq Hai God Mein Hai Chand Sa Pisar
Mana Hai Sharm Roti Hai Munh Pher Pher Kar
Mauqa Na Rokne Ka Hai Ne Bol Sakti Hai
Hazrat Ke Munh Ko Nargisi Aankhon Se Takti Ha
Kehti Hai Ro Ke Bano-e-Aalam Se Baar Baar
Hum Ko Tabah Karte Hain Abbas-e-Naamdar
Hai Londiyon Ke Baab Mein Bibi Ko Ikhtiyar
Kuch Aap Bolti Nahin Is Waqt Main Nisar
Kahiye Jo Rokne Ki Koi Un Ke Raah Ho
Ab Anqareeb Hai Ke Mera Ghar Tabah Ho
Akbar Ka Wasta Koi Tadbeer Kijiye
Imdad Bahr-e-Hazrat-e-Shabbir Kijiye
Kuch Dil Ko Ho Qarar Wo Taqreer Kijiye
Patka Wo Bandhte Hain Na Takhir Kijiye
Ek Dil Hai Mera Aur Kai Gham Ke Teer Hain
Bibi Main Kya Karun Mere Bachche Sagheer Hain
Abbas Dekhte Hain Jo Zauja Ka Iztirab
Hota Hai Teer-e-Gham Jigar-e-Natwan Ke Paar
Rote Hain Khud Magar Ye Ishara Hai Baar Baar
Shohar Ke Gham Mein Yun Koi Hota Hai Be-Qarar
Aao Adab Se Dilbar-e-Zahra Ke Samne
Roti Hain Londiyan Kahin Aaqa Ke Samne
Khola Hai Gondhe Balon Ko Sahib Ye Kya Ye Kya
Peeto Na Sar Ko Rota Hai Farzand-e-Mah Liqa
Khair-un-Nisa Ke Laal Pe Hote Hain Hum Fida
Shadi Ka Hai Maqam Ke Matam Ki Hai Ye Ja
Eiza Mein Sabr Sahib-e-Himmat Ka Kaam Hai
Meri Bhi Aabroo Hai Tumhara Bhi Naam Hai
Lo Poonch Dalo Aansuon Ko Bahr-e-Zuljalal
Dekho Ziyada Rone Se Hoga Hamein Malal
Meri Mufariqat Ka Na Kijo Kabhi Khayal
Qaim Tumhare Sar Pe Rahe Fatima Ka Laal
Gham Chahiye Na Aah-o-Buka Chahiye Tumhein
Shah Ki Salamati Ki Dua Chahiye Tumhein
Sadqe Hain Ibn-e-Fatima Par Mujh Se Sau Ghulam
Dekho Na Rote Dekh Len Tum Ko Kahin Imam
Kya Ashk-e-Khoon Baha Ke Bigarogi Mera Kaam
Hum Haath Jorhte Hain Ye Hai Sabr Ka Maqam
Poochhen Huzoor Gar Ke Tumhein Kya Qubool Hai
Sahib Ye Kehiyo Tum Ke Randapa Qubool Hai
Dekho Ke Ghar Mein Aur Bhi Randain Hain Teen Chaar
Aadaab-e-Shah Se Chup Hain Nahin Koi Be-Qarar
Reh Jaye Baat Karte Hain Wo Umara Hoshiyar
Duniya Hai Be-Sabaat Zamana Hai Be-Madar
Kya Kya Na Tafarruqe Hue Ek Ek Aan Mein
Sahib Sada Koi Bhi Jiya Hai Jahan Mein
Qasim Ko Dekho Janib-e-Kubra Karo Nigah
Guzri Jo Shab To Subah Ko Ghar Ho Gaya Tabah
Dushman Ko Bhi Dikhaye Na Allah Aisa Biyah
Kya Sabira Hai Dukhtar-e-Shabbir Wah Wah
Sehte Hain Yun Jahan Mein Jafaran Rand Hone Ki
Aawaz Bhi Bhala Koi Sunta Hai Rone Ki
Aafat Mein Sabr Karti Hain Is Tarah Bibiyan
Hota Hai Sabiron Ka Musibat Mein Imtihan
Jal Jaye Dil Magar Na Uthe Aah Ka Dhuwan
Uf Kijiye Na Munh Se Jo Pahunchhe Labon Pe Jaan
Charcha Rahe Ke Waqt Pe Kya Kaam Kar Gayi
Chhoti Bahu Ali Ka Bara Naam Kar Gayi
Shohar Ne Ye Kalam Kiye Jab Ba Chashm-e-Tar
Chup Ho Gayi Wo Sahib-e-Himmat Jhuka Ke Sar
Hathiyar Saj Ke Hazrat-e-Abbas Naamwar
Aaye Qareeb Lakht-e-Dil-e-Syed-ul-Bashar
Sadme Se Rang-e-Sibt-e-Nabi Zard Ho Gaya
Kanpe Ye Dast-o-Pak Badan Sard Ho Gaya
Jyon Jyon Qareeb Aate The Abbas Naamwar
Be-Tab The Husain Sambhale Hue Jigar
Kehte The Iztirab Mein Jhuk Kar Idhar Udhar
Jeene Na Dega Aah Hamein Sadma-e-Kamar
Hai Zeest Talkh Fatima Ke Noor-e-Ain Ko
Zainab Kahan Ho Aa Ke Sambhalo Husain Ko
Sab Ghar Ki Betiyon Se Kaho Mere Paas Aayen
Bano Kahan Hain Zauja-e-Abbas Ko Bulayen
Godi Mein Tishna Kaam Sakina Ko Jald Layen
Kooch Ab Jahan Se Hai Hamein Sab Aa Ke Dekh Jayen
Ye Naujawan Sambhale Ga Jis Dam Marunga Main
Abbas Se Har Ek Ki Sifarish Karunga Main
Ye Sun Ke Sari Bibiyan Aayin Ba Haal-e-Zar
Bole Qadam Pe Jhuk Ke Ye Abbas Naamwar
Ae Aaftab-e-Aalamiyan Noor-e-Kirdgar
Hal Min Mubarez Ka Idhar Ghul Hai Baar Baar
Hain Zarra Parwari Ke Chalan Aaftab Mein
Aaqa Ye Der Kis Liye Khadim Ke Baab Mein
Larkon Ne Maarke Mein Kiye Apne Apne Naam
Kya Main Ghulam-e-Khas Nahin Ya Shah-e-Anam
Aisa Din Aur Bhi Koi Hoga Ya Imam
Kis Kaam Ka Jo Aaj Na Kaam Aayega Ghulam
Mushkil Hai Aise Waqt Mein Rukna Diler Ka
Aakhir Pisar Hoon Sher-e-Ilahi Se Sher Ka
---------------
No comments:
Post a Comment