Jab Ran Mein Sar Buland Ali Ka Alam Hua
Hota Jo Sab Se Pehle Fida Khadim-e-Janab
Khush Hoti Khaksar Se Rooh-e-Abu Turab
Ab Hoon Har Ek Ke Aage Khajalat Se Aab Aab
Zahra Se Bhi Hijab Hai Shabbar Se Bhi Hijab
Ab Bhi Na Tegh-o-Teer Agar Tan Pe Khaunga
Maula Batayiye Kise Phir Munh Dikhaunga
Saath Aap Ke Sahunga Na Gar Qatl Ki Jafa
Mujh Se Rasool-e-Pak Khushi Honge Ya Khafa
Bezar Kya Na Hoga Dil-e-Shah-e-Lafata
Phir Fatima Kahengi Mujhe Sahib-e-Wafa
Marne Ka Lutf Na Jeene Ka Mutlaq Maza Raha
Insan Ki Aabroo Na Rahi Jab To Kya Raha
Pala Hai Mujh Ko Ya Shah-e-Dilgeer Aap Ne
Ki Hai Hamesha Pyar Se Taqreer Aap Ne
Bandhwai Hai Kamar Se Ye Shamsheer Aap Ne
Bakhshi Hai Sab Mein Izzat-o-Tauqeer Aap Ne
Waqt-e-Madad Hai Aaj Bhi Imdad Kijiye
Banda Samajh Ke Ab Mujhe Azaad Kijiye
Gardan Hila Ke Shah Ne Kaha Aah Kya Karun
Mushkil Hai Sakht Ae Mere Vallah Kya Karun
Jeene Na Dega Ye Gham-e-Jaan Kah Kya Karun
Chhootta Hai Ab Baradar-e-Zi Jah Kya Karun
Dam Bhar Ki Zindagi Mujhe Dushwar Ho Gayi
Sab To Khafa The Maut Bhi Bezar Ho Gayi
Ghazi Ne Rakh Diya Qadam Shah-e-Deen Pe Sar
Bole Gale Laga Ke Shahanshah Bahr-o-Bar
Ae Tan Ki Jaan Ae Sabab-e-Quwwat-e-Jigar
Yun Hai Khushi To Khair Jahan Se Karo Safar
Bhai Na Ho To Bhai Ki Mitti Kharab Hai
Achha Tumhara Kooch Mera Pas-e-Ab Hai
Rota Hua Jhuka Ba Tasleem Wo Jari
Sab Roye Mashk Dosh-e-Mubarak Pe Jab Dhari
Ek Aah-e-Sard Zauja-e-Abbas Ne Bhari
Sadme Se Rang Zard Tha Aur Tan Mein Tharthari
Sar Se Rida Bhi Dosh Talak Aa Ke Gir Padi
Bano Ke Paas Khak Pe Ghash Kha Ke Gir Padi
Nikla Wo Sher Khaime Se Bahar Alam Liye
Mujre Ko Aayi Fatah Sipah-o-Hasham Liye
Jurrat Ne Barh Ke Bose-e-Tegh-e-Dodam Liye
Nusrat Ne Choomay Haath Zafar Ne Qadam Liye
Khursheed Ka Jalal Nigahon Se Gir Gaya
Iqbal Sar Ke Gird Huma Ban Ke Phir Gaya
Aaya Saja Hua Wo Samand Buraq Sair
Tha Jo Falak Pe Urne Ko Tayyar Misl-e-Tair
Hota Tha Us Ke Dar Se Ghazalon Ka Haal Ghair
Ran Mein Sipah-e-Shaam Use Rok Le To Khair
Sarsar Qadam Ki Gard Ko Paati Nahin Kabhi
Dhoondhe Bashar Pari Nazar Aati Nahin Kabhi
Wo Zeb-o-Zeen-e-Zeen Ki Wo Saaz Wo Phaban
Zevar Se Jaise Hoti Hai Aarasta Dulhan
Chashm-e-Siyah Deeda-e-Aahu Pe Taana Zan
Surat Ye Thi Ke Bhoolte The Chaukri Hiran
Jadoo Tha Mojiza Tha Pari Thi Tilism Tha
Paikar Na Tha Zirah Mein Tahmatan Ka Jism Tha
Rakha Qadam Rikab Mein Haider Ke Laal Ne
Nalain-e-Pak Fakhr Se Chooma Hilal Ne
Bakhshi Jo Sadr-e-Zeen Ko Ziya Khush Jamal Ne
Dum Ko Chanwar Kiya Faras-e-Be-Misal Ne
Kis Naaz Se Wo Rashk-e-Ghazal-e-Khutan Chala
Taoos Tha Ke Sair Ko Sue Chaman Chala
Khushbu Se Arz-e-Pak Riyaz-e-Jinan Bani
Gard Uth Ke Ghaza-e-Rukh-e-Laila Nishan Bani
Jalwe Se Rah-e-Dasht-e-Bala Kehkashan Bani
Zarre Bane Nujoom Zameen Aasman Bani
Sum Badr The To Naal Bhi Charon Hilal The
Naqsh-e-Sum-e-Faras Se Hazaron Hilal The
Wo Dabdaba Wo Satwat-e-Shahana Wo Shabab
Tharra Raha Tha Jis Ki Jalalat Se Aaftab
Wo Raub-e-Haq Ke Sher Ka Zahra Ho Aab Aab
Saulat Mein Fard Daftar-e-Jurrat Mein Intikhab
Tevar Mein Sare Taur Khuda Ke Wali Ke Hain
Shaukat Pukarti Hai Ke Bete Ali Ke Hain
Pahunche Jo Dasht-e-Keen Mein Udate Hue Faras
Ghode Ko Haath Utha Ke Ye Aawaz Di Ke Bas
Dekhen Safen Jami Jo Chap-o-Rast-o-Pesh-o-Pas
Nara Kiya Ke Nahr Pe Jaane Ki Hai Hawas
Rokega Jo Wo Maut Ke Panje Mein Aayega
Hat Jao Sab Ke Sher Tarai Mein Jayega
Roke Hamein Nikal Ke Jo Taqat Kisi Mein Ho
Le Tegh Miyan Se Jo Shujaat Kisi Mein Ho
Garmaye Raksh Ko Jo Hararat Kisi Mein Ho
Aaye Jo Harb-o-Zarb Ki Qudrat Kisi Mein Ho
Do Haath Mein Ali Ke Pisar Aar Paar Hain
Dariya Nahin Ke Ruk Gaya Hum Zulfiqar Hain
Tum Kya Pahad Beech Mein Gar Ho To Taal Dein
Sheron Ko Hum Tarai Se Bahar Nikal Dein
Muhlat Na Ek Ko Dam-e-Jang-o-Jadal Dein
Pani To Kya Hai Aag Mein Ghode Ko Daal Dein
Munh Dekhte Hain Jo Hain Nigahban Ghaat Ke
Le Jayen Ghar Pe Tegh Se Dariya Ko Kaat Ke
Sarkash Hain Sab Hamari Zabardaston Se Zair
Dada Shuja, Baap Ulul Azm, Hum Diler
Jab Ran Pada Hai Kar Diye Hain Zakhmiyon Ke Dher
Laye Hain Ja Ke Aag Se Pani Khuda Ke Sher
Ifreet Bhagte Hain Wo Choten Hamari Hain
Bair-ul-Alam Mein Kood Ke Talwaren Maari Hain
Jurrat Jilau Mein Rehti Hai Nusrat Rikab Mein
Lete Hain Ghaat Peer Ke Teghon Ki Aab Mein
Likhe Hue Hain Sheron Ke Hamle Kitab Mein
Faslen Hain Apne Zor Ki Khaibar Ke Baab Mein
Nasir Hain Badshah-e-Falak Bargah Ke
Daftar Ulat Diye Hain Arab Ki Sipah Ke
Be Mashk Ke Bhare Hamein Aata Hai Chain Kab
Garmi Mein Pyas Se Kai Bachche Hain Jaan Ba-Lab
Asghar Ki Godiyon Mein Tarapti Kati Hai Shab
Kya Waqt Hai Husain Ke Bachchon Pe Hai Ghazab
Laale Pade Hue Hain Sakina Ki Jaan Ke
Kaante Mujhe Dikhaye The Sukhi Zaban Ke
Ibrat Ki Ye Jagah Hai Ke Hum Aur Sawaal-e-Aab
Saqqa Bane Hain Dekh Ke Bachchon Ka Iztirab
Is Mashk Ne Kiya Hamein Uqba Mein Kamyab
Allah Ri Aabroo Ke Bahishti Mila Khitab
Shah Se Nishan-e-Fauj-e-Payambar Bhi Mil Gaya
Tooba Ke Saath Chashma-e-Kausar Bhi Mil Gaya
Ye Zikr Tha Ke Fauj Ki Janib Se Teer Aaye
Neze Utha Ke Sher Ke Munh Par Shareer Aaye
Ye Bhi Jhapat Ke Misl-e-Shah-e-Qila Gir Aaye
Gaiti Hili Ghazab Mein Janab-e-Amir Aaye
Ghoda Uda Paron Ko Sawaron Ke Tod Ke
Lapki Safon Pe Saif Bhi Kaathi Ko Chhod Ke
Aamad Thi Tegh Ki Ke Ajal Ka Payam Tha
Ye Saf Aakhir Thi Wo Risala Tamam Tha
Bijli Sa Har Jagah Faras-e-Tez Gam Tha
Shashdar Thi Maut Chaar Taraf Qatl-e-Aam Tha
Us Ghoul Par Kabhi Thi Kabhi Us Qataar Par
Padta Tha Ek Tegh Ka Saya Hazaar Par
Wo Tegh Ki Chamak Wo Tarap Rahwar Ki
Rafraf Ki Ek Shabeeh To Ek Zulfiqar Ki
Shaukat Sawar Mein Shah-e-Duldul Sawar Ki
Hamloon Mein Shaan Sab Asad-e-Kirdgar Ki
Chitwan Wohi Ghazab Wohi Be-Baakiyan Wohi
Phirti Thi Saf Ba Saf Jo Ali Ki Nigaah Thi
------------
No comments:
Post a Comment