Toda Ye Morcha Ye Saf Ulti Idhar Phire
Talwar Khoon Mein Aap Pasine Mein Tar Phire
Yun Khak Par Gira Ke Layinon Ke Sar Phire
Jaise Shikar Khelte Hue Sher-e-Nar Phire
Thi Qahr Ki Nigah Ghazab Ka Jalal Tha
Aankhen Bhi Surkh Surkh Thin Chehra Bhi Laal Tha
Munh Phir Gaye Sipah Ke Jis Simt Rukh Kiya
Yaan Se Wahan Gaye Use Mara Use Liya
Baqi Rahe Hazar Mein Sau Das Mein Ek Jiya
Allah Re Dam Lahoo Pe Lahoo Tegh Ne Piya
Is Par Bhi Tishnagi Ko Na Taskin Zarra Hui
Goya Thi Aag Pet Mein Us Ke Bhari Hui
Be Shak Tha Un Ka Haath Ameer-e-Arab Ka Haath
Pahuncha Wigha Mein So Taraf Ek Tishna Lab Ka Haath
Aayi Ajal Utha Jo Kisi Be Adab Ka Haath
Sher-e-Khuda Ke Sher Ne Mara Ghazab Ka Haath
Bazu Pe Aayi Tegh Do Dam Shana Kaat Ke
Pahunchon Ko Bhi Qalam Kiya Dastana Kaat Ke
Chalta Tha Misl-e-Barq Yameen-o-Yasar Haath
Dar Dar Ke Jodte The Zalalat Shiar Haath
Un Ki Na Ek Zarb Na Un Ke Hazar Haath
Kafi They Sab Ko Tegh-e-Do Dasti Ke Chaar Haath
Aawaz Shash Jihat Mein Begir-o-Zan Ki Thi
Allah Ka Karam Tha Madad Panjtan Ki Thi
Nara Juda Sada-e-Begir-o-Barah Juda
Gosha-e-Kamaan Se Door The Goshon Se Rah Juda
Baktar Juda Zameen Pe Tukde Zirah Juda
Nezon Ko Dekhiye To Girah Se Girah Juda
Allah Re Farq Gardan-o-Sar Bhi Baham Na The
Kushton Ka Zikr Kya Hai Ke Teghon Mein Dam Na The
Jis Ki Taraf Nazar Dam-e-Jang-o-Jadal Phiri
Kuch Hat Ke Tegh Se Usi Janib Ajal Phiri
Rahwariyon Phira Ke Ishare Mein Kal Phiri
Talwar Bhi Galon Ki Taraf Bar Mahal Phiri
Aise Jari Se Kis Ko Majal-e-Musaf Thi
Yun Phir Ke Saf Ki Saf Ko Jo Dekha To Saaf Thi
Chal Phir Ke Kaatti Thi Wo Talwaren Haath Paon
Dar Se Barha Na Sakte The Khoonkhar Haath Paon
Sar Bach Gaya To Ho Gaye Bekar Haath Paon
Chamki Giri To Aath Hue Chaar Haath Paon
Roohen Pukaren Tegh Phir Aayi Nikal Chalo
Boli Ajal Ab Uth Ke To Panjon Ke Bal Chalo
Teere Idhar Qalam To Udhar Barchhiyan Qalam
Tarkash Do Neem Tukde Kamanen Nishan Qalam
Har Haath Mein Qalam Ki Tarah Ustukhwan Qalam
Munh Tegh Ka Kharab Sinan Ki Zaban Qalam
Jab San Se Aayi Sar Pe Kisi Bad Khisal Ke
Goya Samoom Chal Gayi Phoolon Pe Dhaal Ke
Ki Jis Ne Sarkashi Wohi Fitna Furo Hua
Zalim Hazar Mein Tha Jo Yakta Wo Do Hua
Afshan Lahoo Se Sher Ka Dast-e-Neku Hua
Thanda Wohi Tha Jang Par Sargarm Jo Hua
Tha Khatma Sipah Jahannum Maqam Ka
Shole Bujhaye Deta Tha Pani Husam Ka
Wo Tegh Khol Deti Thi Lohe Ka Bhi Hisar
Tha Us Ke Haath Se Dil-e-Chaar Aaina Figar
Aari Thin Munh Pe Teghon Ke Aise Pare The Dhaar
Khud Apne Sar Patakte The Gir Gir Ke Bar Bar
Pani Wo Zehr Tha Ke Piya Aur Fana Hua
Hai Aaj Tak Zirah Ka Kaleja Chhina Hua
Jaati Thi Har Sare Ki Taraf San Ke Bar Bar
Chadh Ke Sawar Girte The To San Ke Bar Bar
Uthti Thi Al-Aman Ki Sada Ran Se Bar Bar
Har Sar Ka Baar Utarta Tha Gardan Se Bar Bar
Gharat Hue Tabah Hue Be Tazk Hue
Zarb-e-Garan Jo Uth Na Saki Kya Sabuk Hue
119
Sabit Rahi Na Dhaal Na Mighfar Na Sar Bacha
Seene Mein Dil Ko Kaat Gayi Gar Jigar Bacha
Do Tukde Ho Gaya Wo Idhar Jo Udhar Bacha
Be Zakhm Khaye Ek Na Bedadgar Bacha
Talwar Se Koi Koi Dar Se Halak Tha
Salim Tha Jis Ka Jism Jigar Us Ka Chaak Tha
Sar Se Kamar Mein Thi To Kamar Se Tah-e-Faras
Aafat Ka Munh Tha Qahr Ka Dam Kham Sitam Ka Kas
Kushte Tadap Rahe The Chap-o-Rast Pesh-o-Pas
Do The Agar To Chaar Hue Paanch The To Das
Ghul Tha Wohi Lade Jise Sar Tan Pe Baar Ho
Aafat Bapa Hai Kaun Ajal Se Do Chaar Ho
Ghul Tha Shararton Se Us Aatish Zaban Ki
Pariyan Pukarti Thin Ke Ho Khair Jaan Ki
Duniya Mein Shola Baar Hai Aag Is Jahan Ki
Badli Hui Hai Aaj Hawa Aasman Ki
Bijli Khijal Hai Naziya Is Sher Khu Ke Hain
Bochhar Hai Saron Ki Dariyade Lahoo Ke Hain
Jab Barh Ke San Se Surat-e-Tegh-e-Ali Chali
Sabit Hua Ke Zarbat-e-Dast-e-Wali Chali
Dil Par Khafi Chali To Galon Par Jali Chali
Tan Se Nikal Ke Rooh Pukari Chali Chali
Di Tegh Ne Sada Ke Irada Kidhar Ka Hai
Chal Aye Maut Chal Yahi Rasta Saqar Ka Hai
Khushki Mein Thi Jo Aap To Aatish Tari Mein Thi
Ham Naam Zulfiqar-e-Ali Safdari Mein Thi
Talwar Thi Ke Barq Libas-e-Pari Mein Thi
Be Baak Is Liye Thi Ke Dast-e-Jari Mein Thi
Khoon Bhi Use Halal Diyat Bhi Maaf Thi
Kaata Tha Sau Galon Ko Magar Pak Saaf Thi
Sare Risala Dar Tabahi Mein Pad Gaye
Ab Munh Kise Dikhayen Ke Chehre Bigad Gaye
Nami Jo The Jawan Qadam Un Ke Ukhad Gaye
Bhage Jo Sab Nishan Bhi Khajalat Se Gad Gaye
Alamon Ke Paas Dhere Phireeron Ke Ran Mein The
Reti Pe Bairaqen Thin Ke Murde Kafan Mein The
Pehne Hue The Jism Mein Zirah Jo Chust Chust
Choten Kari Padi To Hue Wo Bhi Sakht Sust
Khauf-e-Ajal Se Bhool Gaye Wada-e-Nakhust
Tooti Safon Mein Haath Kisi Ke Na The Durust
Ek Shor Tha Ke Jaan Gayi Is Larai Mein
Ghode Bhagao Aag Lagi Hai Tarai Mein
Ghere The Ek Jaan Ko Do Lakh Ahl-e-Shahr
Thehre Kahan Qarar Kahan Lein Thamen Kidhar
Chhati Ke Paas Barchhiyan Teghen Qareeb-e-Sar
Pehlu Mein Is Taraf To Sinanen Udhar Tabar
Milti Na Thi Aman Sipah-e-Tirah Bakht Se
Goshon Se Teer Chalte The Patthar Darakht Se
Jab Mashk Ki Taraf Koi Aata Tha San Se Teer
Kehte The Ya Hafeez Kabhi Gah Ya Qadeer
Chala Raha Tha Shimr Jafa Pesha-o-Shareer
Jaane Na Paye Lakht-e-Dil-e-Shah Qila Gir
Rukh Is Jari Ka Khaima Ki Janib Se Mod Do
Haan Barchhiyon Se Sher Ke Seene Ko Tod Do
Sun Kar Zaban Darazi-e-Shahr-e-Sitam Shiar
Abbas Misl-e-Sher Jhapatte The Bar Bar
Talwaren Sekron Thin Hazaron The Neza Dar
Todi Agar Ye Saf To Jami Doosri Qataar
Tanha Sambhale Mashk-o-Alam Ya Wigha Kare
Bulwa Ho Sari Fauj Ka Jis Par Wo Kya Kare
Mashhoor Hai Ke Ek Pe Bhari Hain Do Bashar
Dar Pe The Ek Jawan Ke Liye Lakh Ahl-e-Shar
Khaye Idhar Se Zakhm Jo Ki Is Taraf Nazar
Kis Kis Ka Waar Rad Karen Dekhen Kidhar Kidhar
Jab Dam Liya To Seene Pe Sau Teer Chal Gaye
Pehlu Ko Tod Tod Ke Neze Nikal Gaye
Seena Sipar The Mashk Pe Ro Ke Hue The Dhaal
Ladne Mein Bhi Husain Ke Bachchon Ka Tha Khayal
Kehta Tha Dagmaga Ke Faras Parda-e-Khisaal
Farzand Ko Sambhaliye Ya Sher-e-Zuljalal
Ja Pahunchun Mashk Le Ke Jo Thodi Si Raah Ho
Aisa Na Ho Ke Pyason Ki Kashti Tabah Ho
Ye Kehte The Ke Toot Pada Lashkar-e-Kaseer
Bas Choor Ho Gaya Pisar-e-Shah Qila Gir
Aa Kar Laga Miyan Do Abroo Jo Ek Teer
Tevar Aa Gaya Ali Wali Ka Mah-e-Muneer
Chhooti Jo Baag Paon Faras Ke Bhi Ruk Gaye
Phaila Ke Haath Mashk Sakina Pe Jhuk Gaye
Ab Yaan To Khatma Hai Suno Is Taraf Ka Haal
Deorhi Pe Nange Sar Hai Rasool-e-Khuda Ka Laal
Gham Se Kamar Jhuki Hui Rukh Zard Ji Nidhaal
Ye Karb Hai Ke Hota Hai Jo Waqt-e-Intiqal
Gir Gir Uthe Tadap Ke Idhar Se Udhar Gaye
Jab Aah Ki To Sab Ne Ye Jana Ke Mar Gaye
Faryad Kar Ke Dil Kabhi Thaama Jigar Kabhi
Pakdi Tanab-e-Khaima Ki Gah Aur Kamar Kabhi
Ghabra Ke Pyare Bhai Ki Poochi Khabar Kabhi
Roye Pisar Ke Dosh Pe Rakh Kar Ke Sar Kabhi
Ki Aah Samne Kabhi Zahra Ki Jayi Ke
Ro Kar Kabhi Lipat Gaye Bete Se Bhai Ke
Farmate The Karah Ke Akbar Se Bar Bar
Shane Dabao Ae Ali Akbar Pidar Nisar
Kaisa Ye Dard Hai Ke Jigar Ko Nahin Qarar
Bazu Ka Zor Le Gaye Abbas-e-Naamdar
Wah Hasrata Ke Be Kas-o-Be Yaar Ho Gaye
Sar Peeten Kis Se Haath To Bekar Ho Gaye
Chillate The Ke Jaan-e-Baradar Bas Ab Phir Aao
Pahuncha Hai Dam Labon Pe Hamein Aa Ke Dekh Jao
Bhaiya Khuda Ke Waste Ab Barchhiyan Na Khao
Abbas Hum Akheer Hain Tashreef Jald Lao
Pyari Tumhari Nanhe Se Haathon Ko Malti Hai
Ab Tum Ko Dhoondhne Ko Sakina Nikalti Hai
Hazrat To Peette Hain Ye Keh Kar Ba Sad Malal
Khaime Mein Ghash Hai Zauja-e-Abbas Khush Khisaal
Deorhi Pe Ahl-e-Bait Hain Sab Khole Sar Ke Baal
Parde Se Munh Nikale Hain Atfal-e-Khurd Saal
Lab Un Ke Ode Ode Hain Munh Gore Gore Hain
Aankhon Mein Ashk Haathon Mein Khali Katoray Hain
Kehte Hain Sab Labon Pe Zabanon Ko Pher Kar
Ab Pani Le Ke Aate Hain Abbas-e-Naamwar
Hazrat Se Poochti Hai Sakina Ba Chashm-e-Tar
Mere Chacha Kab Aayenge Ya Shah-e-Bahr-o-Bar
Kya Main Safar Karungi Jahan Se Tab Aayenge
Behlate Hain Husain Ke Bibi Ab Aayenge
Ghere Hain Lakh Un Ko Sitamgar Haye Haye
Mango Dua Ke Bhai Ko Mere Khuda Bachaye
Wo Kehti Hai Main Pani Se Guzri Na Mashk Aaye
Haye Haye Bas Ab Chacha Ko Mere Koi Phir Laye
Rakhe Khuda Jahan Mein Ali Ki Nishani Ko
Main Kya Karungi Aag Lage Aise Pani Ko
--------------------
No comments:
Post a Comment