Ye Zikr Tha Ke Fatah Ke Baje Baje Idhar
Tadpe Zameen Pe Gir Ke Shahanshah-e-Bahr-o-Bar
Chillaye Barh Ke Fauj Se Do Char Ahl-e-Shar
Hazrat Kahan Hain Mar Gaye Abbas-e-Naamwar
Kya Kya Chali Hain Teghon Pe Teghen Larai Mein
Wo Zakhm Khaye Sher Pada Hai Tarai Mein
Afshan Hain Sar Ke Khoon Ki Chheenton Se Sab Nishan
Abbas Kanp Jate The Jhukta Tha Jab Nishan
Naamwaron Ne Aaj Mitaya Ajab Nishan
Kyon Ae Husain Kaun Uthayega Ab Nishan
Laash Un Ki Paimal Hui Zakhm Phat Gaye
Jin Mein Ali Ka Zor Tha Wo Haath Kat Gaye
Aayi Sada Ye Nahr Ki Janib Se Ek Baar
Aaqa Tamam Hota Hai Ye Abd-e-Jaan Nisar
Tan Se Nikal Ke Aankhon Mein Atki Hai Jaan-e-Zar
Ab Hai Faqat Huzoor Ke Aane Ka Intezar
Baba Ke Saath Khuld Se Tashreef Laayi Hain
Hazrat Ki Walida Mujhe Lene Ko Aayi Hain
Shah Daud Kar Pukare Ke Aata Hoon Bhai Jaan
Ghar Lut Gaya Hai Khak Udata Hoon Bhai Jaan
Taqat Badan Mein Ab Nahin Pata Hoon Bhai Jaan
Ek Ek Qadam Pe Thokaren Khata Hoon Bhai Jaan
Dast-e-Shikasta Bete Ki Gardan Mein Dale Hain
Bhaiya Hamein To Akbar-e-Mahroo Sambhale Hain
Dekha Jo Dar Se Bint-e-Ali Ne Ye Shah Ka Haal
Deorhi Se Nikli Chand Qadam Khole Sar Ke Baal
Chillati Kaun Qatl Hua Ae Ali Ke Laal
Mud Kar Kaha Husain Ne Abbas Khush Khisaal
Dariya Pe Fauj-e-Shaam Ne Mara Diler Ko
Zainab Ajal Ne Chheen Liya Mere Sher Ko
Khursheed-e-Mashriqain Zamane Se Uth Gaya
Syed Ka Noor-e-Ain Zamane Se Uth Gaya
Wo Aashiq-e-Husain Zamane Se Uth Gaya
Zainab Hamara Chain Zamane Se Uth Gaya
Aata Nahin Qarar Dil-e-Be-Qarar Ko
Dariya Pe Roye Jate Hain Khidmat Guzar Ko
Akbar Ko Haath Utha Ke Pukari Wo Sogwar
Haye Haye Husain Ho Gaye Be-Yaar-o-Gham Gusar
Matam Jawan Bhai Ka Hai Tum Pe Main Nisar
Akbar Khuda Ke Waste Baba Se Hoshiyar
Girne Lagen To Haider-e-Safdar Ka Naam Lo
Beta Pidar Ke Haath Ko Mazboot Thaam Lo
Akbar Pidar Ko Thame Hue Nahr Par Jo Laye
Ghaltan Lahoo Mein Bazu-e-Sarwar Ke Haath Paye
Chillaye Shah Laash Kidhar Hai Koi Bataye
Farq Aa Gaya Hamari Basarat Mein Haye Haye
Ro Lein Gale Laga Ke Tan-e-Pash Pash Ko
Akbar Hamein Dikha Do Baradar Ki Laash Ko
Akbar Ne Shah Ke Haath Pakad Kar Ba Sad Buka
Rakhe Chacha Ke Seene Pe Aur Ro Ke Ye Kaha
Lijiye Yahi Hai Laash-e-Alamdar-e-Ba-Wafa
Chillaye Jhuk Ke Laash Pe Sultan-e-Karbala
Tooti Hui Kamar Hai Sambhalo Husain Ko
Bhaiya Zara Gale Se Laga Lo Husain Ko
Abbas Haath Kat Gaye Shanon Se Hai Ghazab
Reti Pe Do Taraf Ye Tumhara Lahoo Hai Sab
Loota Hamein Rasool Ki Ummat Ne Be-Sabab
Bhaiya Hamari Jaan Nikalti Hai Tan Se Ab
Mar Jayenge Jaga Do Hamein Munh Se Bol Kar
Do Baaten Kar Lo Bhai Se Aankhon Ko Khol Kar
Kyon Khak Par Dhare Ho Ye Rukhsar Khoon Mein Tar
Aao Hum Apne Zanu Pe Rakhen Tumhara Sar
Lete Ho Kyon Karah Ke Karwat Idhar Udhar
Sabit Hua Ke Jald Hai Duniya Se Aab-e-Safar
Haye Haye Daleel-e-Marg Hai Luknat Zaban Ki
Hichki Nahin Ye Jism Se Rukhsat Hai Jaan Ki
Ghash Mein Suni Jo Girya-e-Shabbir Ki Sada
Chonke Tadap Ke Hazrat-e-Abbas Ba-Wafa
Aahistagi Se Arz Ki Ae Sibt-e-Mustafa
Is Pyar Ke Nisar Is Altaaf Ke Fida
Zeba Hai Nikle Jaan Agar Peshwai Ko
Goya Rasool Aaye Hain Mushkil Kushai Ko
Ye Keh Ke Roye Shah Ki Taraf Ki Nazar Ba Ghaur
Jhuk Kar Pukare Shah Ke Bhaiya Kaho Kuch Aur
Tadpa Qadam Pe Shah Ke Wo Maqtool-e-Zulm-o-Jaur
Leen Hichkiyan Bigadne Lage Tevaron Ke Taur
Pathra Ke Chashm-e-Ashk Fishan Band Ho Gayi
Tharraye Dono Honth Zaban Band Ho Gayi
Akbar Ne Arz Ki Ke Chacha Jaan Mar Gaye
Jhuk Kar Pukare Shah Ke Bhaiya Kidhar Gaye
Munh To Uthao Khak Se Rukhsar Bhar Gaye
Wah Hasrata Husain Ko Be-Aas Kar Gaye
Ab Kaun Dega Dukh Mein Nabi Ke Pisar Ka Saath
Dam Bhar Mein Tum Ne Chhod Diya Umr Bhar Ka Saath
Haan Ro-o Momino Ye Buka Ka Maqam Hai
Tum Mein Shareek Rooh-e-Rasool-e-Anam Hai
Ab Rukhsat-e-Husain Alaihissalam Hai
Tarikh Aathvin Hai Muharram Tamam Hai
Maut Aayi To Shareek-e-Aza Kaun Hoga
Jo Saal Bhar Jiye Ga Wo Phir Shah Ko Royega
Aage Tumhare Marte Jo Abbas Ba-Wafa
Pursa Na Dete Sibt-e-Rasool-e-Khuda Ko Kya
Tum Sab Ko Dekhte Hain Shahanshah-e-Karbala
Zahra Bhi Nange Sar Hain Qayamat Karo Bapa
Samjho Shareek-e-Bazm-e-Shah-e-Mashriqain Ko
De Do Jawan Bhai Ka Pursa Husain Ko
Peeto Saron Ko Hota Hai Ab Marsiya Tamam
Lipto Zarih-e-Pak Se Keh Keh Ke Ya Imam
Rukhsat Talab Hai Baap Se Akbar Sa Lala Fam
Khamosh Hain Husain Nahin Karte Kuch Kalam
Maqtool-e-Zulm-o-Jaur Hai Ab Ran Mein Fatima
Hota Hai Panjtan Mein Koi Dam Mein Khatima
Bas Ae Anees Rok Le Ab Khama Ki Inan
Ye Gham Hai Jaan Guda Na Kabhi Hoga Bayan
Aankhon Se Sameeen Ke Bhi Ashk Hain Rawan
Khaliq Se Arz Kar Ke Ae Kh
allaq-e-Ins-o-Jaan
Aankhon Se Mas Karun Main Mazar-e-Batool Ko
Dikhla De Jald Marqad-e-Sibt-e-Rasool Ko
------------------
No comments:
Post a Comment