Aaj Shabbir Pe Kya Aalam-e-Tanhai Hai
Zulm Ki Chaand Pe Zahra Ki Ghata Chhai Hai
Is Taraf Lashkar-e-Aa'da Mein Saf-Aaraai Hai
Yaan Na Beta Na Bhatija Na Koi Bhai Hai
Barchhiyan Khate Chale Jaate Hain Talwaron Mein
Maar Lo Pyase Ko Hai Shor Sitamgaron Mein
Zakhmi Baazu Hain Kamar Kham Hai Badan Mein Nahin Taab
Dagmagaate Hain Nikal Jaati Hai Qadmon Se Rakaab
Pyaas Ka Ghalba Hai Lab Khushk Hain Aankhen Hain Pur-Aab
Tegh Se Dete Hain Har Waar Ka A'da Ko Jawaab
Shiddat-e-Zo'f Mein Jis Jaa Pe Thahar Jaate Hain
Saikdon Teer-Sitam Tan Se Guzar Jaate Hain
Gesu Aalooda-e-Khoon Lipte Hain Rukhsaron Se
Shaane Kat Kat Ke Latak Aaye Hain Talwaron Se
Teer Paiwast Hain Khoon Bahta Hai Sawaron Se
Laakh Aafat Mein Hai Ik Jaan Dil Azaaron Se
Fikr Hai Sajda-e-Ma'bood Mein Sar Dene Ki
Waar Se Teghon Ke Fursat Nahin Dam Lene Ki
Khoon Se Tar Pech Amaame Ke Hain Sar Zakhmi Hai
Hai Jabeen Chaand Si Pur Noor Magar Zakhmi Hai
Seena Sab Barchhiyon Se Ta-Ba-Kamar Zakhmi Hai
Teer-e-Bedaad Se Dil Zakhmi Jigar Zakhmi Hai
Zarb-e-Shamsheer Se Bekaar Hain Baazu Dono
Zulm Ke Teeron Se Majrooh Hain Pehlu Dono
Barchhi Aa Kar Koi Pehlu Mein Laga Jaata Hai
Maarta Hai Koi Neza To Ghash Aa Jaata Hai
Barhte Hain Zakhm-e-Badan Zor Ghata Jaata Hai
Band Aankhen Hain Sar-e-Paak Jhuka Jaata Hai
Gard-e-Zahra-o-Ali Giriya Kunaan Phirte Hain
Ghul Hai Ghode Se Imam-e-Do Jahaan Girte Hain
Girte Hain Qatra-e-Khoon Zakhm-e-Jabeen Se Paiham
Dast-e-Majrooh Se Khinch Sakte Nahin Teer-e-Sitam
Fikr Hai Bakhshish-e-Ummat Ki Kuchh Apna Nahin Gham
Karte Hain Shukr-e-Khuda Khushk Zabaan Se Har Dam
Hai Aba Teeron Se Ghurbaan Qaba Gulgun Hai
Hont Is Waqt Se Zakhmi Hain Dahan Par Khoon Hai
Zeen Se Hota Hai Juda Dosh-e-Muhammad Ka Makeen
Chaman-e-Fatima Ka Sarv Hai Maail-Ba-Zameen
Barchhiyan Gard Hain Aur Beech Mein Hain Sarwar-e-Deen
Hai Yeh Nazdeek Gire Mehr-e-Nubuwwat Ka Nageen
Paanv Har Baar Rakabon Se Nikal Jaate Hain
Ya Ali Kehti Hai Zainab To Sambhal Jaate Hain
Laakh Talwarein Hain Aur Ek Tan-e-Athar Hai
Ek Mazloom Hai Aur Zaalimon Ka Lashkar Hai
Saikdon Khanjar-e-Faulaad Hain Aur Ek Sar Hai
Na Koi Yaar Na Hamdam Na Koi Yaawar Hai
Baagh Ghode Ki Latakti Hai Utha Sakte Nahin
Saamne Ahl-e-Haram Rote Hain Jaa Sakte Nahin
Koi Saiyad Ka Nahin Aah Bachane Wala
Harbe Laakhon Hain Aur Ek Zakhm Uthane Wala
Pyaas Mein Koi Nahin Paani Pilane Wala
Sambhle Kis Tarah Bhala Barchhiyan Khane Wala
Charkh Se Aag Barasti Hai Zameen Jalti Hai
Maare Garmi Ke Zabaan Khushk Hai Loo Chalti Hai
Kahin Dam Lene Ko Saya Nahin Hai Waqt-e-Zawaal
Ainthi Jaati Hai Zabaan Pyaas Ki Shiddat Hai Kamaal
Kabhi Zainab Ka Hai Gham, Gaah Sakina Ka Khayaal
Din Jo Dhalta Hai To Hazrat Hue Jaate Hain Nidhaal
Misl-e-Khurshid Badan Zo'f Se Tharraata Hai
Nair-e-Burj-e-Imamat Pe Zawaal Aata Hai
Kehte Hain Zaalimon Se Khushk Zabaan Dikhla Kar
Bahr-e-Haq Paani Ka Ek Jaam Pilado Laa Kar
Ahl-e-Keen Kehte Hain Yeh Tegh-e-Sitam Chamka Kar
Aab-e-Shamsheer Piyo Barchhiyon Ke Phal Kha Kar
Yeh Sukhan Sun Ke Bhi Ghussa Nahin Farmaate Hain
Yaas Se Sooye Falak Dekh Ke Reh Jaate Hain
Arz Karte Hain Yeh Khaliq Se Ke Ai Rabb-e-Ghafoor
Tu Hai Aalim Ke Nahin Kuchh Tere Bande Ka Qusoor
Karte Hain Yeh Mujhe Be Jurm-o-Khata Teghon Se Choor
Haath Ummat Pe Uthaana Nahin Mujh Ko Manzoor
Jaante Hain Ke Muhammad Ka Nawasa Hoon Main
Paani Dete Nahin Do Roz Ka Pyaasa Hoon Main
Tu Ne Bachpan Se Mere Naaz Uthaaye Ya Rab
Woh Inayat Ki Jo Tujh Se Kiya Main Ne Talab
Tera Mehboob Bana Eid Ko Mera Markab
Roza Rakha To Chhupa Mehr Numayaan Hui Shab
Bhook Mein Khuld Ka Khana Mujhe Imdaad Kiya
Bhej Kar Hirni Ka Bachcha Mera Dil Shaad Kiya
Ab Agar Hai Yeh Teri Maslehat Ai Rabb-e-Qadeer
Ho Rawaan Halq Pe Is Pyaase Ke Aab-e-Shamsheer
Mere Maula Ba Sar-o-Chashm Hai Haazir Shabbir
Hukm-e-Haakim Mein Yeh Taaqat Hai Karoon Main Taakhir
Jald Gardan Pe Rawaan Khanjar-e-Burraan Howe
Ai Khusha Woh Jo Teri Raah Mein Qurbaan Howe
Gham Nahin Kuchh Mujhe Go Bekas-o-Be Yaar Hoon Main
Zer-e-Shamsheer Gala Rakhne Ko Taiyaar Hoon Main
Tu Madadgaar Hai Mukhtaar Hai Lachaar Hoon Main
Waqt-e-Mushkil Hai Inayat Ka Talabgaar Hoon Main
Tere Sajde Mein Yeh Sar Tan Se Juda Ho Jaawe
Ahd-e-Tifli Ka Jo Waada Hai Wafa Ho Jaawe
Sakhtiyan Marg Ki Kar Apne Karam Se Aasaan
Lab Pe Takbeer Ho Jab Halq Pe Khanjar Ho Rawaan
Dil Mein Ho Yaad Teri Band Ho Jis Waqt Zabaan
Dam Bharoon Tera Hi Tan Se Jo Nikalne Lage Jaan
Baad-e-Chehlum Jo Mujhe Qabr Mayassar Howe
Zakhmi Tan Par Na Fishaar Ai Mere Daawar Howe
Rahm Kar Rahm Kar Sharminda Hoon Ai Yaar-e-Khuda
Bandagi Ka Tere Jo Haq Tha Ada Ho Na Saka
Khauf-e-Mahshar Se Badan Kaanpta Hai Sartapa
Hogi A'maal Ki Pursish To Kahoon Ga Main Kya
Koi Tohfa Tere Laayaq Nahin Paata Hai Husain
Haath Khaali Tere Darbaar Mein Aata Hai Husain
Taqwiyat Dil Ko Karam Se Hai Tere Ya Rahmaan
Nahin Maayoos Ke Rehmat Hai Teri Be Paayaan
Mushkilein Bandon Ki Kar Deta Hai Dam Mein Aasaan
Shukr Altaaf-o-Inaayaat Mein Qaasir Hai Zabaan
Aasiyon Se Bhi Mohabbat Nahin Kam Karta Hai
Jurm Woh Karte Hain To Lutf-o-Karam Karta Hai
Main Teri Raah Mein Mazloomi Se Hota Hoon Fida
Tu Hai Aagah Ke Do Din Ka Hoon Bhooka Pyaasa
Chahta Hoon Main Yahi Apni Shahadat Ka Sila
Maghfirat Ummat-e-Aasi Ki Ho Ai Baar-e-Khuda
Hai Gawaara Mujhe Jo Kuchh Ke Aziyat Howe
Un Ko Duniya Mein Bhi Uqba Mein Bhi Raahat Howe
Arz Karte They Yeh Khaliq Se Shah-e-Banda Nawaz
Yak Ba Yak Aalam-e-Bala Se Yeh Aai Aawaaz
Ai Mere Sher Ke Farzand Nabi Ke Damsaaz
Tujh Se Hum Khush Hain Pazeera Hai Tera Ajr-o-Niyaaz
Mard Hai Aashiq-e-Kaamil Hai Wafadaar Hai Tu
Jo Kaha Woh Hi Kiya Saadiq-ul-Iqraar Hai Tu
Tu Bhi Maqbool Hai Aur Teri Ibaadat Bhi Qubool
Yeh Itaat Bhi Hai Maqbool Yeh Taaat Bhi Qubool
Aajizi Bhi Teri Maqbool Shahadat Bhi Qubool
Teri Khaatir Se Hamein Bakhshish-e-Ummat Bhi Qubool
Hum Ne Khail-e-Shuhada Ka Tujhe Sardaar Kiya
Ummat-e-Ahmad-e-Mukhtaar Ka Mukhtaar Kiya
Dostdaaron Ka Tere Gulshan-e-Jannat Hai Muqaam
Ta-Abad Saaya-e-Tooba Mein Karenge Aaraam
Honge Mahshoor Tere Saath Azaadaar Tamaam
Tujh Ko Jo Royenge Aanch Un Pe Hai Dozakh Ki Haraam
Gham Na Kha Ahl-e-Jahaan Tere Muhibb Saare Hain
Tu Hai Pyaara Tere Pyaaron Mein Bhi Hamein Pyaare Hain
Honge Har Ranj Se Mehfooz Tere Taaziya-Daar
Sakhti-e-Marg Na Un Ko Hai Na Eeza-e-Fishaar
Dam-e-Murdan Nazar Aavega Ali Ka Deedaar
Qabr Se Gulshan-e-Firdaus Ki Dekhenge Bahaar
Daar-e-Duniya Hi Mein Hain Jo So Unhein Eeza Hai
Aankhen Jab Band Huin Phir Dar-e-Jannat Waa Hai
Tujh Sa Aabid Na Hua Hai Na Koi Howega
Teer Kha Kha Ke Kisi Ne Bhi Hai Yun Shukr Kiya
Taa'at-e-Khalq Se Ek Sajda Hai Afzal Tera
Arsh-e-Aazam Pe Malaaik Teri Karte Hain Sana
Saara Ghar Meri Mohabbat Mein Fana Tu Ne Kiya
Bandagi Ka Tha Jo Kuchh Haq Woh Ada Tu Ne Kiya
Hashr Tak Royega Mazloomi Pe Teri Aalam
Tera Maatam Nahin Howega Jahaan Mein Kabhi Kam
Rauza-e-Paak Ko Tere Yeh Sharf Bakhshenge Hum
Aayenge Jis Ki Ziyaarat Ko Malak Ho Ke Baham
Yeh Zameen Arsh Se Rutbe Mein Siwa Howegi
Khaak-e-Turbat Ki Teri Khaak-e-Shifa Howegi
Yeh Sada Sun Ke Hue Shaad Shah-e-Har Do Sara
Aa Gayi Az Sar-e-Nau Jism Mein Taaqat Goya
Jhuk Ke Sajde Ki Taraf Ajz Se Ro Kar Yeh Kaha
Mere Maula Main Teri Banda Nawaazi Ke Fida
Kyun Na Mumtaaz Ho Woh Tu Jise Rutba Bakhshe
Is Kaf-e-Khaak Ko Kya Rutba-e-Aala Bakhshe
Abhi Maula Ne Sar-e-Ajz Uthaya Na Tha Aah
Neza Ek Chhaati Pe Maara Jo Kisi Ne Naagah
Ghash Mein Girne Lage Ghode Se Imam-e-Zi Jaah
Aayi Khaatoon-e-Qayamat Ki Sada Bismillah
Thaamne Aaye Ali Khuld Se Ghabraye Hue
Daude Mehboob-e-Khuda Haathon Ko Phailaaye Hue
Ek Jafa Kesh Ne Phir Pehlu Pe Neza Maara
Chhid Gaya Tod Ke Chhaati Ko Kaleja Saara
Pusht-e-Taazi Pe Sambhalne Ka Na Paaya Yaara
Gir Pada Khaak Pe Woh Arsh-e-Khuda Ka Taara
Gard Aalood Qaba-e-Shah-e-Pur Noor Hui
Ret Zakhmon Ke Liye Marham-e-Kafoor Hui
Khaak-o-Khoon Mein Jo Tadapte The Shahanshah-e-Zaman
Gul Ke Maanind Khile Jaate They Sab Zakhm-e-Badan
Talab-e-Aab Mein Khole Hue The Khushk Dahan
Gird Khinche Hue Talwarein Khade The Dushman
Gham-e-Naamoos Bhi Tha Pyaas Ki Bhi Shiddat Thi
Phir Sakina Ko Na Dekh Aaye Yahi Hasrat Thi
Kaan Mein Aati Thi Zainab Ke Sadaaye Jaankah
Dil Tadap Jaata Tha Karte They Ajab Dard Se Aah
Raah Roke Hue Khaime Ki Khade They Gumraah
Neem Waa Chashm Se Karte The Soo-e-Khaima Nigah
Tan-e-Zakhmi Pe Jo Paikaan-e-Sitam Gadte They
Khaak Se Uthte The Aur Kaanp Ke Gir Padte They
Kehta Tha Fauj Mein Sab Se Umar Bad Akhtar
Khinche Kyun Teghon Ko Haathon Mein Khade Ho Shashdar
Reeg-e-Tafteeda Pe Hai Ghash Mein Ali Ka Dilbar
Jaao Kya Der Hai Kaato Shah-e-Mazloom Ka Sar
Tegh Se Fatima Zahra Ka Gala Chaak Karo
Jald Haan Khatima-e-Panjatan-e-Paak Karo
Aise Mazloom Ka Sar Kaatna Kya Hai Dushwaar
Jis Ka Koi Bhi Madadgaar Na Hamdard Na Yaar
Auratein Hain Kai Khaime Mein Ghareeb-o-Naachaar
Mar Chuke Pehle Hi Jo Khoon Ke The Dawedaar
Khoon Baha Bhi Na Koi Maangne Ko Aavega
Ek Pisar Hai So Woh Beemaar Hai Mar Jaavega
Kaanp Kar Kehte The Sab Hum Se Na Hoga Yeh Sitam
Zabh Farzand-e-Muhammad Ko Nahin Karne Ke Hum
Aise Mazloom Ki Chhaati Pe Jo Rakhega Qadam
Paanv Jal Jaayega Tharraayega Arsh-e-Aazam
Peetate Qabr Se Mehboob-e-Khuda Aavenge
Ba-Khuda Fatima Ki Aah Se Jal Jaavenge
Kaun Bekas Ko Bhala Zabh Kare Be Taqseer
Phirta Hai Koi Pyaase Ke Gale Par Shamsheer
Go Ke Bekas Hai Pa Aasaan Nahin Qatl-e-Shabbir
Hashr Mein Honge Mehboob-e-Khuda Daaman-Geer
Tu Samajhta Hai Ke Us Ka Koi Khoon Khwah Nahin
Bint-e-Ahmad Nahin Haider Nahin Allah Nahin
Tha Jo Damsaaz Umar Ibn-e-Numair Azlam
Barh Ke Tegh Us Ne Sar-e-Shah Pe Maari Is Dam
Ta Jabeen Ho Gaya Majrooh Sar-e-Shah-e-Umam
Thaam Kar Sar Ko Pukaare Yeh Imam-e-Aalam
Na Mayassar Tujhe Is Haath Se Khana Howe
Tu Tahi Dast Jahannam Ko Rawaana Howe
Chaaha Zaalim Ne Ke Phir Shah Pe Kare Tegh Ka Waar
Dekha Angusht Ba-Dandaan Hain Rasool-e-Mukhtaar
Khushk Is Waqt Hue Dast-e-Sitamgar Ek Baar
Haath Se Tegh Giri Khauf Se Bhaaga Khoon-Khwaar
Yaan Sar-e-Paak Se Hazrat Ke Lahoo Jaari Tha
Kham Soo-e-Qibla They Band Aankhen Theen Ghash Taari Tha
Jab Tadapne Ki Bhi Taaqat Na Rahi Sarwar Ko
Ghul Hua Yeh Ke Ghash Aaya Khalaf-e-Haider Ko
Fauj Se Shimr Barha Khinche Hue Khanjar Ko
Sab Se Kehta Tha Ke Ab Kaato Sar-e-Sarwar Ko
Khalaf-e-Ahmad-e-Mukhtaar Ka Qaatil Hoon Main lo
Kaam Mera Hai Usi Kaam Ke Qaabil Hoon Main
Mujh Ko Haider Se Gharaz Hai Na Muhammad Se Hai Kaam
Ro Dein Mehboob-e-Khuda Howe Khush Haakim-e-Shaam
Daulat-e-Fatima Le Jaaoon Main Paaoon Inaam
Rooh-e-Haider Ki Ho Bechain Mujhe Ho Aaraam
Munh Na Main Daulat-e-Duniya Se Kabhi Pheroon Ga
Aaj Zahra Ke Kaleje Pe Chhuri Pheroon Ga
Tez Karta Hua Khanjar Ko Gaya Shah Ke Qareen
Aasmaan Hil Gaya Tharra Gayi Maqtal Ki Zameen
Ro Ro Chillane Lagi Zainab-e-Naashaad-e-Hazeen
Ghash Mein Bhi Ghere Hain Haaye Haaye Mere Bhai Ko La'yeen
Rahm Zahra Ke Pisar Par Nahin Khaata Koi
Khaak Se Bhi Nahin Zakhmi Ko Uthaata Koi
Kis Se Faryaad Karoon Jaa Ke Main Dukhiya Haaye Haaye
Na Muhammad Hain Na Haider Hain Na Zahra Haaye Haaye
Laakh Dushman Hain Mera Bhai Hai Tanha Haaye Haaye
Teghon Se Katta Hai Zahra Ka Kaleja Haaye Haaye
Sarv-e-Gulzaar-e-Risaalat Ko Qalam Karte Hain
Haaye Saiyed Pe Musaafir Pe Sitam Karte Hain
Gird Zainab Ke Tha Naamoos-e-Payambar Ka Hujoom
Bano Roti Thi Khadi, Peetti Thi Sar Kulsoom
Kehti Thi Dekh Ke Maidaan Ko Sakina Masoom
Ai Phuphi Nargha-e-A'da Mein Hain Shah-e-Mazloom
Jaaungi Ab Main Thaharne Ki Nahin Aap Ke Paas
Shimr Khanjar Liye Jaata Hai Mere Baap Ke Paas
Baap Ke Paas Se Jaa Kar Use Sarkaaoongi
Jod Kar Haathon Ko Minnat Se Main Samjhaaoongi
Apne Baba Ki Main Chhaati Se Lipat Jaaungi
Khaime Tak Un Ko Sambhaale Hue Le Aaungi
Bhoohke Pyaase Mere Baba Ko Na Maare Koi
Un Ke Badle Mera Sar Tan Se Utaare Koi
Kitna Roka Use Bano Ne Pe Hargiz Na Ruki
Chhote Se Haathon Se Sar Peetti Maidaan Ko Chali
Peechhe Sar Khole Hue Khaime Se Zainab Nikli
Pahunchi Ran Mein To Sakina Yeh Umar Se Boli
O La'yeen Haider-e-Karrar Ki Poti Hoon Main
Rahm Kar Mujh Pe Ke Bin Baap Ki Hoti Hoon Main
Dekh Ghurbat Ko Meri Kar Mere Bachpan Pe Nazar
Baap Maara Gaya Mera To Jiyungi Kyun Kar
Sar Pe Aavegi Yateemi To Main Jaaungi Kidhar
Main To Hoon Baap Ki Shaida Mera Aashiq Hai Pidar
Baap Bin Ek Dam Aaraam Na Aavega Mujhe
Kaun Phir Raat Ko Chhaati Pe Sulaavega Mujhe
Hansliyan Apni Gale Se Tujhe Deti Hoon Utaar
Le Mere Kaan Ka Durr Par Mere Baba Ko Na Maar
Haathon Ko Jodti Hoon Main Tere Aage Naachaar
Mana Kar De Koi Bekas Ko Na Maare Talwar
Ghar Mein Jo Kuchh Zar-o-Zevar Hai Woh Laadoongi Main
Jaan Baba Ki Bachegi To Dua Doongi Main
Bheed Mein Mujh Ko Nazar Aate Nahin Baba Jaan
Itna Keh De Ke Sarak Jaayen Yeh Sab Be-Imaan
Gird Phir Phir Ke Main Hoon Apne Pidar Ke Qurbaan
Jaa Ke Dekhoongi Badan Par Hain Lage Zakhm Kahaan
Dam-e-Aakhir To Bhala Kaam Mein Aaun Un Ke
Apne Kurte Se Lahoo Munh Ka Chhudaun Un Ke
Kitna Kehti Rahi Woh Bint-e-Shah-e-Arsh-e-Janaab
Is Sitamgar Ne Diya Kuchh Na Sakina Ko Jawaab
Peet Kar Sar Kaha Zainab Ne Ke O Khaana-Kharaab
Tujh Ko Aata Nahin Kuchh Rooh-e-Payambar Se Hijaab
Zulm Mat Kar Asadullah Ki Jaai Hoon Main
Nange Sar Parde Se Baahar Nikal Aayi Hoon Main
Meri Amma Ka Hai Mashhoor Jahaan Mein Parda
Baad-e-Rihlat Bhi Janaaza Na Kisi Ne Dekha
Us Ki Beti Hoon Tere Zulm Se Yeh Waqt Pada
Sar Barahna Hoon Garebaan Bhi Hai Kurte Ka Phata
Munh Ko Allah-o-Payambar Se Chhupaata Hai Tu
Main To Faryaadi Hoon Aur Aankh Churaata Hai Tu
Maara Jaata Hai Tere Saamne Zahra Ka Pisar
Dekhta Hai Tu Yeh Talwarein Hain Padti Kis Par
Teer Kis Ko Lage Ghirbaal Hua Kis Ka Jigar
Zabh Karne Ko Kise Kheenche Hai Zaalim Khanjar
Dil-e-Zahra Jigar-e-Sher-e-Khuda Katta Hai
Zulm Se Tere Muhammad Ka Gala Katta Hai
Qatl-e-Mazloom Ko Kyun Karta Hai Be Jurm-o-Gunaah
Ab Talak Main Ne Bahut Sabr Kiya Hai Wallah
Dil Jali Hoon Main Abhi Seene Se Kheenchoon Gar Aah
Tu Bhi Jal Jaaye Teri Fauj Bhi Ho Khaak Siyaah
Bad Dua Doon Main To Naazil Abhi Aafat Howe
Sar Ke Baalon Ko Jo Kholoon To Qayamat Howe
Ghash Mein Hazrat Ne Sune Jabke Yeh Zainab Ke Sukhan
Khol Kar Deeda-e-Pur Khoon Ko Uthaai Gardan
Dekha Sar Nange Khadi Roti Hain Maqtal Mein Bahen
Bint-e-Zahra Ko Pukaare Yeh Shahanshah-e-Zaman
Kya Kiya Tum Ne Ke Parde Se Khule Sar Niklein
Jeete Ji Mere Sar-e-Parda Se Baahar Niklein
Kis Ko Samjhaati Ho Koi Na Sunega Faryaad
Baaz Aayega Nahin Qatl Se Mere Jallaad
Jitna Tum Peetti Ho Aur La'yeen Hote Hain Shaad
Hashr Ke Roz Khuda Devega Is Khoon Ki Daad
Shauq Marne Ka Hai Sar Tan Se Juda Hone Do
Jaao Ghar Mein Mujhe Ummat Pe Fida Hone Do
God Mein Meri Sakina Ko Uthaao Hamsheer
Koi Asghar Ki Tarah Maar Na Baithe Usey Teer
Phir Yeh Beti Ko Pukaare Tere Sadqe Shabbir
Tu Bhi Ja Saath Phuphi Jaan Ke Ab Ai Dilgeer
Waqt-e-Taa'at Hai Zara Yaad-e-Khuda Kar Lewen
Hum Bhi Ab Aate Hain Sajde Ko Ada Kar Lewen
Keh Ke Yeh Ghash Hue Phir Ran Mein Shahanshah-e-Umam
Shimr-e-Azlam Ne Rakha Seena-e-Aqdas Pe Qadam
Jigar-e-Fatima Zahra Pe Chali Tegh-e-Do Dam
Aage Zainab Ke Hue Zabh Husain Aah Sitam
Peet Kar Bint-e-Shahanshah-e-Zaman Rone Lagi
Baap Ko Beti Beradar Ko Bahen Rone Lagi
Fatah Ka Fauj-e-Mukhalif Mein Baja Naqqaara
Ghul Hua Qatl Hua Sher-e-Khuda Ka Pyaara
Bas "Anees" Ab Nahin Goyaai Ka Mujh Ko Yaara
Gham Se Khoon Ho Gaya Seene Mein Kaleja Saara
Kis Se Is Dard-o-Museebat Ka Bayaan Hota Hai
Aankhen Roti Hain Qalam Rota Hai Dil Rota Hai
------------
No comments:
Post a Comment